भारत की संस्कृति के लिए... भाषा की उन्नति के लिए... साहित्य के प्रसार के लिए
सूरज नै कुण कतल कर दियो / मंगत बादल
Kavita Kosh से
सूरज नै कुण कतल कर दियो,
भरियै दुफारै में ।
अर कातिल आय लुक्यो बैठ्यो है,
थां रै म्हांरै में ।
आज घटावां मिल
आँधी सूं
कांई साजिस रचगी ?
कठै बिलमग्यो जाय
उजाळै रै
आ कांई जचगी ?
कीं सूं डरी चानणी
दापळ
बैठी महलां में
अेक भैंस सगळी भैंस्या नै
करगी गारै में ।
कुण कतरी है पाँख ?
कल्पना
उडणै सूं रैयगी ।
झड़ग्या काचा पान
पून कोई
जहरीली बैयगी ।
मूं’डो सीम मानवी बैठ्या
कानां लियां आँगळी
बेरो नीं के सोधै
आँख्यां मींच अँधारै में ।
