भारत की संस्कृति के लिए... भाषा की उन्नति के लिए... साहित्य के प्रसार के लिए
सैर री माया / विनोद कुमार यादव
Kavita Kosh से
गांव अब
नीं रैयो गांव
वार्ड बणग्यो
नगर परिषद रो
जिण में
धिकै नीं
भोळा मिनख
बिकै प्लाट
मिलै रोटी
मनै ठाट
खेतां नै जीमग्या
कळ-करखाना
जठै नीं चालै हळ
पण जरूर लागै फळ
अब मूंछ नीं
मांदा डील में
बधै बोट बळ।
जिण खनै
घणा बोट
उण ने
परमेसर री ओट
कोई भी
बण सकै परमेसर
नेतागीरी री
चढ्यां घोट।
गाँव तो गाँव है
निरी बावळ
भूख रो घर
आवळ-कावळ
सैर री माया
सिरे सूं सावळ।
