जहाँ बहै छै प्रेम के धारा
आरो सात नदी के घाट,
जहाँ शान गिरिराज हिमालय
विंध्याचल आरो मंदार
संस्कार छै जहाँ सम्पदा
आरो ज्ञानी छै धनवान,
यैहनोॅ भारत जन्मभूमि छै ।
हमरा छै एकरोॅ अभिमान ।
वेद मंत्र आरो गुरुवाणी
भोरे-भोरे जहाँ बाजै छै,
ईश्वर अल्ला एक कही केॅ
आपस मेॅ सब गरोॅ लगै छै,
जहाँ अनेकता मेॅ छै एकता
सब्भे जन छै एक समान,
यैहनोॅ भारत जन्मभूमि छै ।
हमरा छे एकरोॅ अभिमान ।
क्षमा-दया निष्काम भावना
रग-रग जहाँ समैलोॅ छै,
नानक, बुद्ध, कबीर के वाणी
सब्भे मनोॅ में छैलोॅ छै;
माय-बाप बच्चा रोॅ खातिर
जे भूमि पर छै भगवान,
यैहनोॅ भारत जन्मभूमि छै ।
हमरा छै एकरोॅ अभिमान ।
रचनाकाल- 8 अप्रेल 2014