भारत की संस्कृति के लिए... भाषा की उन्नति के लिए... साहित्य के प्रसार के लिए
हमरा शरद अति मन भावै / कुमार संभव
Kavita Kosh से
हमरा शरद अति मन भावै
चानो साथें चमचम चमकै
नव नील अकासोॅ में उमगै,
शरदोॅ के उपमा मुश्किल छै
लाल कमल के आभा गमकै,
शरद चाँदनी रोॅ उजास में
तन ताप त्रय सकुचाबै,
हमरा शरद अति मन भावै।
तन-मन के आभा निखरै छै
देखी शरदोॅ के रूप मनोहर,
लाल-लाल कमलोॅ सें भरलोॅ
लागै कत्तेॅ स्वच्छ सरोवर,
शीतल मंद हवा के बहवोॅ
हमरा जी केॅ बड़ी सुहाबै,
हमरा शरद अति मन भावै।
गाछ बिरिछ चारोॅ तरफैं लहरै
चन्द्र छटा धरती पर छहरै,
आलू-गोभी, चना, मटर लता पर
साथ हवा के शरदोॅ बिचरै-विहरै,
चिड़िया के चुनमुन सुनी-सुनी केॅ
रहि-रहि शरद सुन्दरी मुस्कावै,
हमरा शरद अति मन भावै।
