भारत की संस्कृति के लिए... भाषा की उन्नति के लिए... साहित्य के प्रसार के लिए
हर साल तुलसी-जयन्ती आवै छै / रामधारी सिंह 'काव्यतीर्थ'
Kavita Kosh से
हर साल तुलसी-जयन्ती आवै छै
इस्कूलोॅ में, कॉलेजोॅ में
साहित्यिक के बीचोॅ में
बड़ी धूमधामोॅ सें
हर्ष आरो उल्लासोॅ सें
तुलसी-जयन्ती मनावै छै।
छोटोॅ अतिथि, बड़ोॅ अतिथि
आरू मुख्य अतिथि आवी केॅ
तुलसी पर कम
मतरकि वोकरोॅ ‘मानस’ पर
घंटौ भाषण दै छै।
इस्कूली में छोटाका विद्यार्थी
तुलसी के सम्बन्ध में
गीत आरू लोकगीत गावै छै
कॉलेज के लड़का आरू लड़की सिनी
लघुनाटक आरो प्रहसन दिखावै छै।
दर्शक सिनी देखी-देखी
हर्षित होय-होय
गाँव-घरोॅ में जाय केॅ
‘कैरीकेचर’ करि-करि केॅ
लोगोॅ केॅ रिझावै छै।
तुलसी केरोॅ नीकोॅ विचार
सद्भाव, ज्ञान-ध्यान
भक्ति आरो आत्मज्ञान
गुरू-आदेश मानै लेॅ
कोय-कोय बतलावै छै।
बड़ो कवि, बड़ोॅ सन्त
समाज सुधारक भी
उपदेशक भी कम नै
निर्भीकता के जोड़ नै
समन्वय के सम्राट कहावै छै।
