भारत की संस्कृति के लिए... भाषा की उन्नति के लिए... साहित्य के प्रसार के लिए
हवा सागै सागो / हरीश बी० शर्मा
Kavita Kosh से
गोधूळी वेळा
जद सूरज आपरै घरां जावै
चंदरमा आभै आवण नैं
कसमसावै
अर एक....दो.....दस-बीस..... पचासूं
तारा खिंड जावै
लटक जावै
बीं वेळा
रिंधरोई में बैठो
तपती बेळू नैं ठंडी हुंवती, सेंवतो
आस लगावै
सूरज काल फेरूं आसी
आभो फेरूं तपसी
मेघ बरस रे
अबकै बरस तो बरस
सोचतो-सोचतो
बळध जोड़‘र गाडै में
गांव री हवा सागै
सागो कर लेवै।
