भारत की संस्कृति के लिए... भाषा की उन्नति के लिए... साहित्य के प्रसार के लिए
हाँसिरहोस् सधैँभरि / गीता त्रिपाठी
Kavita Kosh से
हेरी कैले अघाउन्न संसारका आँखा
हाँसिरहोस् सधैँभरि हाम्रो सगरमाथा
चुलिएर हेरिरन्छ छाडी जानेलाई
फर्की आउँछु भनी झूठो कसम खानेलाई
सम्झाउँछ बुद्ध, सीता, भृकुटीका गाथा
हाँसिरहोस् सधैँभरि हाम्रो सगरमाथा
जूनतारा पग्लिएर आफैँ भेट्न आउँछन्
जाई, जुही फुलेसरि शिरमाथि छाउँछन्
रक्तनाता भन्दा गाढा उस्को-हाम्रो नाता
हाँसिरहोस् सधैँभरि हाम्रो सगरमाथा
नेपालीको गौरव छुन्छ संसारको शिर
जराजरा फैली धुन्छ नेपालीको पीर
रसाउँछ छातीभित्र रूखा डाँडापाखा
हाँसिरहोस् सधैँभरि हाम्रो सगरमाथा
•
