ॿाल वर्ष खांपोइ / हेमराज नागवाणी
सुबूह जो
आफ़ीस लाइ
बस में चढ़न्दे
मूं हिकु छोकरो ॾिठो
उमिरि यारहं ॿारहं साल
अभोॻा वार
गदिलो चेहरो
फाटल कपड़ा
बस जे लॻभॻ
विच वारी सीट ते
दरीअ भरिसां
पाणु समेटे
हू इएं वेठो हुओ
भांइ लिकी वेठो हुजे
-तोड़े जो बस में लिकए लाइकु
का बि जॻहि कोन हुई-
संदसि भरि में वेठल सॼण
खांउसि, इएं लिकी विहण जो
सबबु पुछियो।
हुन वटि पैसा कोन हुआ
ऐं हुन खे
अञा ॿीअ बस में चढ़ी
कंहिं टींअ जाइ ते पहुचणो हो।
सॼण हुन खे ॿीअ बस में सफ़रु करण लाइ
रोक पैसा ॾिना,
हिन बस जी टिकेट वठण जी ख़ातिरी ॾिनी
ऐं
हुन खे झोलीअ में पियल
सिरुनि जा टुकरा फिटा करण लाइ चयो।
छोकरे पैसा संभाले रखिया ऐं
झोल मां सिरोटो कढी
चॿाड़ण लॻो!
हुन खे बुख लॻी हुई!!
मंू दया ॾेखारे हुन खे पैसा कोन ॾिना
न ई मूं इएं सोचियो त
हू पंहिंजे कर्मनि जो फलु भोॻे रहियो हुओ
न वरी इहो त सिरोटा
चॿाड़े चॿाड़े, हू
इंक़लाब जो बानी बणिजन्दो।
मां
हुन खे
सिर्फ़ ॾिसन्दो रहियुसि
ऐं तॾहिं
जीअं अक्सर फ़िल्मुनि में थीन्दो आहे
हुन जो चेहरो बदिलजी
मुंहिंजे पुट जो चेहरो बणिजी वियो!!
मुंहिंजे अन्दर मां
का दांहँ निकिरे
इन खां अगु
मंू ॾिइो त
अॻियां सीट ख़ाली थी रही हुई
ऐं मां
फुड़तीअ सां उन ते वेही रहियुसि।
