भारत की संस्कृति के लिए... भाषा की उन्नति के लिए... साहित्य के प्रसार के लिए
ઘર અને આકાશ / ભરત ત્રિવેદી
Kavita Kosh से
મારા ઘરની ચાર દીવાલો
ઘરને કાયમ ટોકતી રહે છે કે
હદમાં રહે !
ઘરને થાય કે બારીમાંથી
બહાર કૂદી પડું,
પણ
છતનો વિચાર આવતાં જ
રોકાઈ જાય છે.
છત ધારે તો ગમે ત્યારેય
ઊડવા માંડે
પણ ઊડી ઊડીને જાય ક્યાં
આકાશ સુધી જ ને !
દીવાલો ટોક્યા કરે છે
ઘરને
અને ઘર તાક્યા કરે છે
બારીને
અને છત તાક્યા કરે છે
આકાશને...
