आखरी कलाम / पृष्ठ 2 / मलिक मोहम्मद जायसी का स्रोत देखें

{{KKGlobal}}
{{KKRachna
|रचनाकार=मलिक मोहम्मद जायसी
}} 
[[Category:लम्बी कविता]]
'''मुखपृष्ठ: [[आखरी कलाम / मलिक मोहम्मद जायसी]]'''

[[आखरी कलाम / पृष्ठ 1 / मलिक मोहम्मद जायसी|<< पिछला भाग]]


धूत एक मारत गनि गुना । कपट-रूप नारद करि चुना ॥<br>
`नावँ न साधु', साधि कहवावै तेहि लगि चलै जौ गारी पावै ॥<br>
भाव गाँठि अस मुख, कर भाँजा । कारिख तेल घालि मुख माँजा ॥<br>
परतहि दीठि छरत मोहिं लेखे । दिनहिं माँझ अँधियर मुख देखे ॥<br>
लीन्हे चंग राति दिन रहई । परपँच कीन्ह लोगन महँ चहई ॥<br>
भाइ बंधु महँ लाई लावै । बाप पूत महँ कहै कहावै ॥<br>
मेहरी भेस रैनि के आवै । तरपड कै पूरुख ओनवावै ॥<br>

मन-मैली कै ठगि ठगै, ठगै न पायौ काहु ।<br>
वरजेउ सबहिं `मुहम्मद', असि जिन तुम पतियाहु ॥11॥<br><br>

अंग चढावहु सूरी भारा । जाइ गहौ तब चंग अधारा ॥<br>
जौ काहू सौं आनि चिहूँटै । सुनहु मोर बिधि कैसे छूटै ॥<br>
उहै नावँ करता कर लेऊ । पढौ पलीता धूआँ देऊ ॥<br>
जौ यह धुवाँ नासिकहि लागै । मिनती करै औ उठि उठि भागै ॥<br>
धरि बाईं लट सीस झकोरै । करि पाँ तर, गहि हाथ मरोरै ॥<br>
तबहि सँकोच अधिक ओहि हौवै । `छाँडहु, छाँडहु!' कहि कै रोवैं ॥<br>
धरि बाहीं लै थुवा उडावै । तासौं डरै जो ऐस छोडावै ॥<br>

है नरकी औ पापी, टेढ बदन औ आँखि ॥<br>
चीन्हत उहै `मुहम्मद', झूठ-भरी सब साखि ॥12॥<br><br>

नौ सै बरस छतीस जो भए । तब एहि कथा क आखर कहे ॥<br>
देखौं जगत धुध कलि माहाँ । उवत धूप धरि आवत छाहाँ ॥<br>
यह संसार सपन कर लेखा । माँगत बदन नैन भरि देखा ॥<br>
लाभ, दिउ बिनु भोग, न पाउब । परिहि डाड जहँ मूर गँवाउब ॥<br>
राति क सपन जागि पछिताना । ना जानौ कब होइ बिहाना ॥<br>
अस मन जानि बेसाहहु सोई । मूर न घटै, लाभ जेहि होई ॥<br>
ना जानेहु बाढत दिन जाई । तिल तिल घहै आउ नियराई ॥ <br>

अस जिन जानेहु बढत है, दिन आवत नियरात ।<br>
कहै सो बूझि `मुहम्मद' फिर न कहौं असि बात ॥13॥<br><br>

जबहिं अंत कर परलै आई । धरमी लोग रहै ना पाई ॥<br>
जबहीं सिद्ध साधु गए पारा । तबहीं चलै चोर बटपारा ॥<br>
जाइहि मया-मोह सब केरा । मच्छ-रूप कै आइहि बेरा ॥<br>
उठिहैं पंडित बेद-पुराना । दत्त सत्त दोउ करिहिं पयाना ॥<br>
धूम-बरन सूरुज होइ जाई । कृस्न बरन सब सिष्टि दिखाई <br>
दधा पुरुब दिसि उइहै जहाँ । पुनि फिरि आइ अथइहै तहाँ ॥<br>
चढि गदहा निकसै धरि जालू । हाथ खंड होइ, आवै कालू ॥<br>

जो रे मिलै तेहि मारै, फिरि फिरि आइ कै गाज ।<br>
सबही मारि `मुहम्मद', भूज अरहिता राज ॥14॥<br><br>

पुनि धरती कहँ आयसु होई । उगिलै दरब, लेइ सब कोई ॥ <br>
`मोर मोर', करि उठिहैं झारी । आपु आपु महँ करिहैं मारी ॥<br>
अस न कोई जानै मन माहाँ । जो यह सँचा अहै सो कहाँ ॥<br>
सैंति सैंति लेइ लेइ घर भरहीं । रहस-कूद अपने जिउ करहीं ॥<br>
खनहिं उतंग, खनहि फिर साँती । नितहि हुलंब उठै बहु बाँती ॥<br>
पुनि एक अचरज सँचरै आई । नावँ `मजारी' भँवै बिलाई ॥<br>
ओहि के सूँघे जियै न कोई । जो न मरै तेहि भक्खै सोई ॥<br>

सब संसार फिराइँ औ लावै गहिरी घात ।<br>
उनहूँ कहै `मुहम्मद' बार न लागिहि जात ॥15॥<br><br>

पुनि मैकाइल आयसु पाए । उन बहु भाँति मेघ बरसाए ॥<br>
पहिले लागै परै अँगारा । धरती सरग होइ उजियारा ॥<br>
लागी सबै पिरथिवीं जरै । पाछे लागे पाथर परै ॥<br>
सौ सौ मन कै एक एक सिला । चलै पिंड घुटि आवैं मिला ॥<br>
बजर-गोट तस छूटैं भारी । टूटैं रूख बिरुख-सब झारी ॥<br>
परत धमाकि धरति सब हालै । उधिरत उठै सरग लौं सालै ॥<br>
अधाधार बरसै बहु भाँती । लागि रहै चालिस दिन-राती ॥<br>

जिया-जंतु सब मरि घटे जित सिरजा संसार ।<br>
कोइ न है `मुहम्मद', होइ बीता संघार ॥16॥<br><br>

जिबरईल पाउब फरमानू । आइ सिस्टि देखब मैदानू ॥<br>
जियत न रहा जगत केउ ठाढा । मारा झोरि कचरि सब गाढा ॥<br>
मरि गंधाहिं, साँस नहिं आवै । उठै बिगंध, सडाइँध आवैं ॥<br>
जाइ देऊ से करहु बिनाती । कहब जाइ जस देखब भाँती ॥<br>
देखहु जाइ सिस्टि बेवहारू । जगत उजाड सून संसारू ॥<br>
अस्ट दिसा उजारि सब मारा । कोइ न रहा नावँ-लेनिहारा ॥<br>
मारि माछ जस पिरथिवीं पाटी । परै पिछानि न, दीखे माटी ॥<br>

सून पिरथिवीं होइगई, दहुँ धरती सब लीप ।<br>
जेतनी सिस्टि `मुहम्मद' सबै भाइ जल-दीपि ॥17॥<br><br>


मकाईल पुनि कहब बुलाई । बरसहु मेघ पिरथिवीं जाई ॥<br>
उनै मेघ भरि उठिहैं पानी । गरजि गरजि बरसहिं अतवानी ॥<br>
झरी लागि चालिस दिन राती । घरी न निबुसै एकहु भाँती ॥<br>
छूटि पानि परलय की नाईं । चढा छापि सगरिउँ दुनियाईं ॥<br>
बूडहिं परबत मेरु पहारा । जल हुलि उमडि चलै असरारा ॥<br>
जहँ लगि मगर माछ जित होई । लेइ बहाइ जाइहि भुइँ धोई ॥<br>

सून पिरथिवीं होइहि, बूझे हँसै ठठाइ ।<br>
एतनि जो सिस्टि `मुहम्मद', सो कहँ गई हेराइ ॥18॥<br><br>

पुनि इसराफीलहि फरमाए । फूँके, सब संसार उडाए ॥<br>
दै मुख सूर भरै जो साँसा । डोलै धरती, लपत अकासा ॥<br>
भुवन चौदहो गिरि मनु डोला । जानौ घालि झुलाव हिंडोला ॥<br>
पहिले एक फूँक जो आई । ऊँच-नीच एक -सम होइ जाई ॥<br>
नदी नार सब जैहै पाटी । अस होइ मिले ज्यों ठाढी माटी ॥<br>
दूसरि फूँक जो मेरू उडहै । परबत समुद्र एक होइ जैहैं ॥<br>
चाँद सुरुज तारा घट टूटै । परतहि खंभ सेस घट फूटै ॥<br>

तिसरे बजर महाउब, अस धुइँ लेब महाइ ।<br>
पूरब पछिउँ `मुहम्मद'एक रूप होइ जाइ ॥19॥<br><br>

अजराइल कहँ बेगि बोलावै । जीउ जहाँ लगि सबै लियावै ॥<br>
पहिले जिउ जिबरैल क लेई । लोटि जीउ मैकाइल देई ॥<br>
पुनि जिउ देइहि इसराफीलू । तीनिहु कहँ मारै अजराईलू ॥<br>
काल फिरिस्तिन केर जौ होई । कोइ न जागौ, निसि असि होई ॥<br>
पुनि पूछब "जम! सब जिउ लीन्हा ?। एकौ रहा बाँचि जो दीन्हा ?॥" <br>
सुनि अजराइल आगे होइ आउब । उत्तर देब, सीस भुइँ नाउब ॥<br>
आयसु होइ करौं अब सोई । की हम, की तुम , और न कोई ॥<br>

जो जम आन जिउ लेत हैं, संकर तिनहू कर जिउ लेब ।<br>
सो अवतरें मुहम्मद' देखु तहुँ जिउ देब ॥20॥<br><br>



[[आखरी कलाम / पृष्ठ 3 / मलिक मोहम्मद जायसी|अगला भाग >>]]