"सुपनै रो सुख / शिवराज भारतीय" के अवतरणों में अंतर

उणनैं ठा है
बां दस रिपियां में
नीं भरीजै
पप्पूड़ै रै स्कूल री फीस
नीं करा सकै उणनैं
नुवां गाभा
अर नीं दिरा सकै
नुवों बस्तो
बां दस रिपियां में नी हुवैलो ईलाज
नीं आवैली दुवायां
बापू रै दमै री
उणनैं ठा है
बां दस रिपिया में
सगळै घर रा
एक बखत भी
धाप‘र नीं सो सकैला
पण उणनैं ठा है
बो दस रिपियां में
मोलाय सकै सुपनो
एक रात सारू
दस रिपियां रो सट्टो
सो‘कीं दिरावै
सुपनै में
फीस, बस्तो, गाभा धुवाई
अर सगळां नै
धाप‘र रोटी।
सुपनै में
तिसळज्यै मुळक
उणरै
पड़पड़ाइज्यै होठां माथै।
उणनै ठा है
सौ में सूं
एक मिनख रो हुसी
सुपनो पुरो
लारला मसळता रैसी हाथ
पण सुपनै रा सुख
दस रिपिया हाथ आवतां ई
ले जावैं उणनैं
आपूं-आप खींच‘र
सट्टै री ठौड़।