बना सोवइं अंटारी जगावा सखी
कजरी झूला उत्सव का गीत
कउन रंग मुंगवा कउन रंग मोतिया
कउन रंग ननंदी के विरना
लाल रंग मूंगा सुपेत रंग मोतिया
संवरे रंग ननंदी के बिरना
काहेन सोहइं मुंगवा काहेन सोहई मोतिया
काहेन सोहइं ननंदी के बिरना
गले सोहइ मुंगवा कानेन सोहइ मोतिया
सेजरिया सोहइं ननंदी के बिरना
टूटि जइहै मुंगवा बिखरि जइहैं मोतिया
रूठि जइहैं ननंदी के बिरना
बिन लेबइ मुंगवा बटोर लेबइ मोतिया
मनाय लेबइ ननंदी के बिरना