"एइसन दुनिया एइसन लोग / मोती बी.ए." के अवतरणों में अंतर

एइसन दुनिया एइसन लोग
रामजी बनवले रहें ना।

भरल रहे राम नदिया में पानी
बनल रहे गोरी तोहरी जवानी
पानी में मछरिया हाथ में फँसरिया
रामजी बनवले रहें ना।
एइसन दुनिया...

बँसुरी बजावे पनघटवाँ सँवरिया
बहकि बहकि जाए गोरी के नजरिया
कूँआँ में गगरिया हाथ में रसरिया
रामजी बनवले रहें ना।
एइसन दुनिया...

चिरई ले आवे राम चुनि चुनि दाना
उड़ि उड़ि फुदुकि फुदुकि गावे गाना
खेतवा में दनवाँ फेड़ में खतोनवाँ
रामजी बनवले रहें ना।
एइसन दुनिया...

हँसति रहे राम दियना में बाती
पिया बिनु जियरा जरे दिन राती
गोरी के गवनवाँ पिया के भवनवाँ
रामजी बनवले रहें ना।
एइसन दुनिया...