बळती बाजै बावळिया
करलै मानखै रो मोल।
दोरो जीणो रै साथीड़ां जठ्ठै
चौड़े-धाड़ै पोल।।
भुजबळ तोल ताण लै मुट्ठी
खारो बणकर जी।
नाजोगे मिनखां नै पड़सी
जीणो जे‘र नै पी
मिनख-जूण री जय बोलणिया
खुल्लम खुल्ला बोल।
दोरो जीणो रै साथीड़ां अट्ठै
चोड़ै धाड़ै पोल।
आंख्यां छोड्यो धरम आपरो
काना पड़ी कुबाण
माथै री मत मांदी पड़गी
न्याय ताकड़ी काण
अलख जगा पतवार थाम लै
नैया डांवां डोल।
बळती बाजै रै बावळिया
कर ले मानखे रो मोल।
मीठी लागै पीड़ पावणी
खारो दुःख रो सीर
अन्तस रै आभै में उमड़ै
बादळ नैणा नीर।