भारत की संस्कृति के लिए... भाषा की उन्नति के लिए... साहित्य के प्रसार के लिए
मां अर म्हैं /अंकिता पुरोहित
Kavita Kosh से
Neeraj Daiya (चर्चा | योगदान) द्वारा परिवर्तित 17:56, 6 जुलाई 2013 का अवतरण
मां कद झलाया
सगळा बरत
ठाह नीं पण करूं
म्हैं नेम सूं,
बरत री कथावां
मां रै कंठां सूं निकळ’र
कद बसगी म्हारै कंठां
है ज्यूं री ज्यूं
ठाह ई नीं पड़ी!
जित्ता गीत
मां नैं आवै
बित्ता ई आवै म्हनैं
बियां ई जुड़ै जाड़ा
बियां ई दूखै माथो
बियां ई चालै पगां में रीळ
बियां ई जीमूं
सगळां रै जीम्यां पछै!
मां !
थूं कद बैठगी
ऊंडै आय’र म्हारै
है ज्यूं री ज्यूं?
