भारत की संस्कृति के लिए... भाषा की उन्नति के लिए... साहित्य के प्रसार के लिए
विनती / उमेश बहादुरपुरी
Kavita Kosh से
सशुल्क योगदानकर्ता ४ (चर्चा | योगदान) द्वारा परिवर्तित 10:59, 13 मार्च 2019 का अवतरण
गद्य पद्य नञ् छंद के जानूँ नञ् भाषा के ग्यान
दिला सकऽ हऽ तूँ ही मइया जग में हमरा पहचान
संसकिरित अंगरेजी हिंदी हे ग्यानी के खातिर
अग्यानी मगही ही हम ओकरो में नञ् शातिर
विनती कर रहलुँ तोहरा से हम बालक नादान
दिला सकऽ हऽ तूँ ही मइया जग में हमरा पहचान
हम्मर बाजी तोर हाँथ में रखिहा मइया लाज।
नञ् सरसता वाणी में हे अधूरा हम्मर साज।
हमरा रस्ता नञ् सूझे हम राही अंजान
दिला सकऽ हऽ तूँ ही मइया जग में हमरा पहचान
कोय कहऽ हे वीणापाणी कोय मइया शारदे
हमरा जइसन अग्यानी बोले मइया हमरा तार दे
चाहऽ त हो जाय मइया पल भर में उत्थान
दिला सकऽ हऽ तूँ ही मइया जग में हमरा पहचान
ऐसन कुछ लिखवा दे मइया देके आशीर्वाद
मिट गेला पर अमर रहूँ हम लोग करथ फिर याद
हमरो तूँ करवा दऽ मइया साहित-रस के पान
दिला सकऽ हऽ तूँ ही मइया जग में हमरा पहचान
