भारत की संस्कृति के लिए... भाषा की उन्नति के लिए... साहित्य के प्रसार के लिए
नारी / कुन्दन शर्मा
Kavita Kosh से
Sirjanbindu (चर्चा | योगदान) द्वारा परिवर्तित 10:04, 15 फ़रवरी 2022 का अवतरण ('{{KKGlobal}} {{KKRachna |रचनाकार= कुन्दन शर्मा |अनुवादक= |संग्रह= एउ...' के साथ नया पृष्ठ बनाया)
कति रूप लिएँ यो जीवनमा
कति रूप लिनेछ अकै पनि
म छोरी, बहिनी
प्रेमिका, पत्नी, जननी
तिमीझैँ बाँच्न जन्मेकी
एउटा शरीर, एक प्राण
म नारी
मलाई बाँच्न देऊ कतै नारी भई ।
छोरी मात्र नसम्झ मलाई
नबोलाऊ खालि बहिनी भनी
नसोच प्रेमिका मात्र
नरोज केवल पत्नी मानी
जननीमा पनि मेरो पूर्ण पहिचान छैन
त्यहाँ त
मेरो गर्भ कब्जाएर
मनमानी गरेका छौ तिमीले
मेरो जीवनसित ।
ए निरङ्कुश शासक ! मेरो अस्तित्वको
बेदखल गर्न चाहन्छु म
तिमीलाई आफ्ना सिमानाबाट
स्वेच्छाको आमन्त्रण पर्ख अब
बाँच्न चाहन्छौ भने मसित ।
मेरो लक्ष्य
तिमीमा मात्र हुन सक्दैन
जीवनको लेखाजोखा गर्दा
केही अर्थ, केही सन्तोष चाहिन्छ
मलाई पनि बाँच्नलाई ।
सम्मान गर मेरो अस्तित्वको
म पनि तिमीझैँ
बाँच्न जन्मेकी
बाँच्न चाहने
एउटा प्राणी
मेरो जीवन कसैको सम्पत्ति हैन।
