आपां मिळिया? / श्यामसुंदर भारती

यूं मिळिया आपां

म्हैं थां सूं मिळियौ
       जकौ म्हैं नीं हौ
            थां ई म्हां सूं मिळिया
        जका थां नीं हा

मिळतां पांण
     म्हैं तपाक सूं हाथ आगै कियौ
           जकौ म्हां’रौ नीं हौ
           थां ई झट हाथ लांबौ कियौ
                     जकौ थां’रौ नीं हौ

यूं आपां मिळ नै
     दूजा-दूजा हाथ मिळाया
           दूजी-दूजी मुळक पसारी
           खिणखौळै चढिया
       घणी सारी दूजी-दूजी बातां करी
    
इण भांत बार-बार
       
         दूजा-दूजा आपां
         एक-दूजे सूं मिळिया
                   
      आपां कदैई मिळिया ?