आइ बाट पर चलैत
सभ लोक अनचिन्हार लगैत अछि
गाम-घर टोल-पड़ोस
आ देस-कोसक
सगरो लोकक मुहेंठ पर
विवशताक धुपछाँही पसरल छैक
मेघ आकाशमे
चकभाउर करैत अछि
अहाँ किऐ एना सरंगपताल देखा रहल अछि ?
हमर हाथ-पैर सुन्न अछि
अहाँ केहन धूर्त छी
से हम आइए बुझलहुँ अछि
सगरो संसारमे
दीप टिमटिमाइत अछि
तैयो अहाँ अनभुआर बनल छी ?
गाछक धोधरिमे
सैंतल चिड़ैक बच्चाकें
साँप गिरि गेल अछि
मोनक प्रत्येक दोग सान्हिमे
पसाही लागल छैक
बताह कखन-की करत
तकर कोन ठेकान ?
कनिएँ थम्हू
हम पहिरन बदलि लैत छी