बिल्ली ई, सरकारी बिल्ली
एक दिन बौंसी, दस दिन दिल्ली ।
पीयै सबटा औंटलोॅ दूध
ओकरो पर छालियो के सूद
पोरलोॅ दहीयो साथें जोरन
छोड़बो करै तेॅ, जेहनोॅ फोरन
होली जाय छै कोठी दिन-दिन
घर में घुरै छै बनली बाघिन ।
ई बिल्ली नै हेन्है जैतै
साठी माय रङ घुरथैं रहतै
हमरोॅ हिस्सा के संग खैतै
मीं-मीं रङ हरमुनियम गैतै ।
आरे कुत्ता आ तू-तू
ई भोकसी पर मारैं मूँ
एकरोॅ देह के गरदा झाड़
आरो फेरू मूँछ उखाड़
एकरोॅ मूँ में भरबै भूसोॅ
रहतै, रहोॅ घरोॅ में मूसोॅ ।