बिहानैदेखि यो बाटो
जाँदैछ कता
आवारा भएर ।
घरहरूलाई छोड्दै छोड्दै
अगाडि अगाडि
पछाडि पछाडि
मात्तिदै लरखराउँदै।
परसम्म
यो बाटो कतै छिरेन घरहरूमा ।
बाटै बाटो
पेटीहरूलाई छुँदै
अग्लिँदै भासिँदै
ओरालो उकालो
जादैछ गन्तव्यविहीन ।
कुनै पाटीमा बिसाँउदैन
कुनै फलैँचामा रोकिँदैन
कुनै बस्तीमा अडिदैन
कुनै शहरमा थुप्रिँदैन ।
भिरालो
तेर्सो
नागी-नागी
एक्लै एक्लै
हिँडिरहेछ ।
हेर, बाटो
कतै बिसाउँदैन ।