क्षितिजमा यत्रतत्र छरिएका दृश्यहरु
मनको आँखाको कूचीले
हृदयको क्यानभासमा बटुलेर हेरे
एउटा सम्पूर्ण चित्र बन्यो।
कालो बादललाई चिर्दै आभा फ्याँकिरहेको उषा,
एक जोडी चखेवा प्रेमालापको क्षण,
बीच सागरमा गन्तव्यतिर नौका खियाइरहोको माझी,
सृष्टिका सम्पूर्ण रंग समेटेर
पृथ्वी र आकाशलाई जोड्दै गरेको इन्द्रेणी,
गोधुलीमा गोठतिर फर्कदै गरेका बस्तु बथान,
केटाकेटीको खेल हेरेर रमाइरहेका चराहरु,
आनन्दको परकाष्टामा सम्पूर्ण प्वाख फिजाएर
नाचिरहेको मूजुर।
क्षितिजमा कोरिएका यी चित्रलाई
यथार्थमा रुपान्तरित गरुँ गरुँ लाग्यो
शान्तसँग आफ्नै आँगनीमा कोरुँ लाग्यो।