हम तो से पूछींला जुलूमी सिपहिया, बता दे हमके ना।
काहे गोलिया चलवले बता दे हमके ना।
हमरो बलमुआ न चोर-बटमारवा
जाँगर ठेठाइ आपन पाले परिवारवा
केकरा हुकुमवा से खूनवा बहवले, बता दे हमके ना।
काहे खूनवा बहवले, बता दे हमके ना।
मरि-मरि खेतवा में अन्न उपजवनीं,
जिनिगी में बनल रहनीं तबो हम पवनी
कवना कनूनिया से अगिया लगवले, बता दे हमके ना।
काहे अगिया लगवले, बता दे हमके ना।
अब बरदास नहीं होत फजीहतिया
तोहरो अजदिया, हमार भइल रतिया
अपने मतरिया प तनले बनूकिया, बता दे हमके ना
काहे तनलें बनूकिया बता दे हमके ना।
हम तो से पूछींला जुलूमी सिपहिया, बता दे हमके ना
काहे गोलिया चलवले, बता दे हमके ना।
रचनाकाल : 18.11.1981