मी गाइड गढ़वाल को गढ़वाल लिजौलू।
छोयों का वे देस ह्यूं-कांठों मा घुमौलू।।
धार कखी सैण कखी कखी दमल्ला।
हेरि की निर्झक मन कर्द नचल्ला।
आवा चला पैटा तुमू थै बि बतौंलू।।....मि गाइड....
बण भटुकी जैकी सुद लगद साक्यूं
सोर का वि पांर च जो रिद्द आंख्यूं
गाणि नखा बण चखुली सी उड़दन पचीं
गौं-गुठ्यार धार-सारी सबी जगौं स्वीं
गारि-गारि का ढुंग्यूं की कथा सुणौलू।।....मि गाइड....
नै-पुराणा जांदा पलतीरों का पार
चमखणों निछट्टो मा उकाळ-उंदार
बिनसर केदार कनै बाटु बतौंलू ।।....मि गाइड....
रौंतेली थाती हमारी रौंतेला बूण
स्वाणी सुहांदी सदानी पुळलहटै जून
बैठ बगड़ों मा करवी कथा पुर्योंलू।।....मि गाइड....
छन बिरड़्यां या विसर्या जो बि बटोई
रौंसिया जिकुड़ी का थाति का पिड़ोई
ऊंवूळ चा रैबार त रैबार दियोलू।।....मि गाइड....
डाळि-डाळि ब्वाद कथा गीत पंवेरी
बांज-बुरांसा की बणै बीच घसेरी
बोण कुलैं का क्य बोदीं वखी सुणौंलू।।....मि गाइड....
गाड की पुजेंण वळी गंगलोड्यूं मा
च्वीं की पस्यो हैरि बणी ऊं पुगड्यूं मा।