तिमी पुल हौ
म थाकेको सडक
तिम्रो र मेरो सन्धिस्थलमा
समयको ट्राफिकजाम छ यसबेला ।
जब खुल्नेछ बाटो
टेक्नुपर्नेछ तिम्रो छाती
दुखाएर तिमीलाई म फेरि,
कसरी हिम्मत गरुँला पारि जान !
बरु बग्न चाहन्छु म
तिमीले जोडेको धर्तीमा
बगिसकेको पानी ठानेर
नफेर्नू त्यो जीवनदायी दृष्टि
अन्यत्र !
म उही शीतलपनमा
निरन्तर फर्किरहन चाहन्छु
तिम्रै स्नेहसिक्त छातीको अतल गहिराइमा
यो वर्ष पनि उसैगरी।