अलिकति माटो
र अलिकति आकाश नहुने मान्छे दास हो !
अलिकति चिन्तन
र अलिकति विद्रोह नहुने मान्छे दास हो !
जसको आफ्नो निजी घृणा हुँदैन
जसको आफ्नो निजी प्रेम हुँदैन
त्यो दास हो !
जो अँध्यारोसँग तर्सन्छ
र उज्यालो मागेर यात्रा गर्छ
त्यो दास हो !
जो भोकको लागि आफूलाई बेच्छ
त्यो दास हो !
जसले हाँस्न अनुमति माग्छ
जसले रुन अनुमति माग्छ
त्यो दास हो !
जो हरदम भइरहन्छ आफ्नै छायाँसँग भयभीत
त्यो दास हो !
जसले आफ्नो टाउकोमा बोक्दैन
आफ्नै विचार
र जो आफैँसँग लड्दैन
त्यो दास हो !
जो इशारामा बाँच्छ
त्यो दास हो !
जो तयार छैन मान्छे हुन
त्यो दास हो !
जसले निर्माण गर्दैन प्रतिरोधको हतियार
र गर्दैन आफ्नै कायरतामाथि प्रहार
त्यो दास हो !
जो मौन छ
र जसले चुपचाप स्वीकार गर्छ प्रतिबन्धित जीवन
त्यो दास हो !
जसले आफ्नै सपनाको रक्षा गर्न सक्दैन
त्यो दास हो !
जसको स्वतन्त्र पीडा हुँदैन
त्यो दास हो !
दासहरूको कुनै भूगोल / संस्कृति र सभ्यता हुँदैन ।
किनकि -
दासहरूको कुनै देश हुँदैन !
०००