कोठाको चुकुल खोलेर
घर बाहिर आएँ
लाग्यो अलिकति मुक्त भएँ !
आँगन
बगैंचा
पर्खाल नाघेर आएँ
लाग्यो अलिकति मुक्त भएँ !
खेत
गोरेटो
नहर
बस्ती छाडेर आएँ
लाग्यो अलिकति मुक्त भएँ !
खोला / खर्क
पहाड / पर्वत / कन्दरा नाघेर आएँ
लाग्यो अलिकति मुक्त भएँ !
सम्बन्ध / प्रेम / राजनीति सबै त्यागेर आएँ
लाग्यो अलिकति मुक्त भएँ !
किस्ता किस्तामा
अलिअलि मुक्त हुनु पनि मुक्ति हो ।
जस्तो कि
बन्धनको लामो शृङ्खला पार गर्दै
म मसम्म आएँ !
०००