पन्दरै अगस्त मनावां
सालूं साल
गावां गीत
नाचां-कूदां
गूंजावां च्यारूमेर
आजादी रो संगीत
देस रै इतिहास री
घणी महताऊ घटना है आजादी
जिणनैं जरूर याद राखणी
पण नीं बिसराणीं
इण मौकै री दूजी घटना
जद कूक्या
पंजाब, लाहौर अर पटना
देस री नदियां रो पाणी
रातो हुग्यो
मिनखां रै लोही सूं
के मुसळमान अर के हिन्दू
सैं रो मिनखपणो सोग्यो
मिनख माथै
राखस हावी हुग्यो
खंड-खंड हुग्या
मिनख/परवार
अर
खंड-खंड हुग्यो देस।