एक दिन
सपना निअन उरेहल इंजोर
झकझकाएल-तऽ
मन के सिरा में
गीत के कनी फूटल।
हम का जानी -
ओकर आखर के बुनाई कढ़ाइ,
बाकी, फूल पर बइठल
मातल भउरवा से पुछली -
कि भाई रे!
तूँ जानऽ हें-ओकर अरथ
ऊ चुप्प...
फिन पुछली -
दबारे... तिबारे
तब, तनीसुन गुनगुनाएल
आउ उड़गेल... फुरदपर।
हम ऊ फूल से पुछली -
तूँ जानऽ हऽ-ओकर अरथ?
ऊ हो नेव गेल, लजाके
देखते भरमें (सभेफूल फुलवारी के)
करे लगलन कानाफूसी
बाकी, जस के तस रहगेल
हमर सबाल।
गोर/दप-दप उज्जर बगुला
जे, अकास खिलल जाइत हल
रोक के कहली ओकरो से
अपन मन के दरद,
ओहू लहस के बढ़ गेल, आगे।
झूमित फेड़ के
लरचित डहुऽगी से कहली
एँ गोइ,
इ झुमौनी के गुर
हमरो देवऽ तनीसुन -
माँगली, लजएले -
एगो कनकनी
एगो सुरता
एगो ललछौंही लाज
एगो बतौनी बतकही
एगो रोआँ के सिहरनी।
कनहूँ/केउ में तो
लौके/कुनमुनाए
ऊ हिरदाके/बजल सितार के
झिनझिनी।