उभ सां मिलन्दड़ चिमिनियूं
दूंहां, मकान
जेट, राकेट
ऐं हवायूं सैटलाईट्स
टाईप राईटर, कार, लिफ़टूं-
चंड ॾांहुं माण्हू पियो वञे
न्यूज-पेपर ज़ोरु आहिनि!
बाक़्िसंग जो छा थियो?
ठोंशे सां हू वियो मरी?
पब्लिसिटी ऐं इनाम!
वाह सभ्यता वाह वाह...
बन मां माण्हूअ खे कढी तो
खेसि आहिनि शहर बख़्शिया
रोशनी ऐं रोशनी ऐं रोशनी!
ऐं तजुर्बा ऐटमी!!
मिलिट्री बेसज़ि!!!
ऐं समाजी ज़िंदगी?
कहिड़ो सुहिणो मौक़ो आहे
हू बि हाजु़र कोन आहे
आउ प्यारी आउ
तुंहिंजो फोटो
मुंहिंजे खीसे में पियो आ-
हिक हयाती, हिक जवानी
रोज़ साॻियो केरु खाए?
मुंहिंजी पूंजी फ्रेंच लेदर!
अचु त तुंहिंजी ॿांहं में
हिकु चकु मां पायां
शहरु कोई मनु न आहे,
बनु जिते आ
मन जे बन खे बाहि ॾे तूं
बन में बन-मानुस रहे थो
पाण सिविलाईजि़्ड आहियूं
तोखे तुंहिंजो मुड़िसु आहे
मूंखे पंहिंजी ज़ाल आहे
बेवकूफ़नि जी कमी नाहे जहान में
तुंहिंजे घरि ऐं मुंहिंजे घरि आ ॻाल्हि साॻी
हलु त होटल में हलूं
ऐं प्यार में थोरो लडूं
आहि अंगनि जी लड़ाई
कार में खिसिकी हलूं
हलु त अंगनि खे लडायूं
हलु त जज़्बनि खे थकायूं!
मुंहिंजा जज़्बा फ़ौजी आहिनि
तुंहिंजा जज़्बा फ़ौजी हून्दा
कामु आहे जिस्म जी हिक राॼनीती
मुंहिंजे अंदर रूस आहे
तो में का यू.एस हून्दी
अचु त उलझूं!
अचु त उलझूं!
अचु त उलझूं!
अचु त कारो मुंहुं करियूं...