कदे-कदे दिनुग्यै
उठती बेळा
का काम माथै जांवतां
क्यूं नीं होवै म्हारै में किरकौ
जद कै चालतो रैणो
कुदरत रौ नेम है
सूरज-हवा-पाणी
सदा चालता रैवै
आखी जिया-जूण
हर बगत
कीं न कीं करती रैवै
बो देखो ! उण भर्यो है
दिनुगै पै’ली
सब्जी रो गाडो
अब जासी गांवां में
तपतै तावड़ै
बेच सी सारै दिन सब्जी
उण लाद्यो है
साइकल पर कपड़ो
कित्ता ई साइकिलआळा
आ बड़्या है कस्बै में
ले’र दूध
गाडैआळा
गाडा ले’र निकळ्या है
आखै दिन करैला ढुआई
मजूर निकळग्या है- मजूरी पर
भट्ठां पर ईंटां थपीज री है/पक री है
किसानां री तो बात ही के है
बै तो दिन-रात
भाजता रैवै
घाटो सैय’र खेती करै
सै’र री जिन्दगी नै
सोखी गिणां
पण बाणियां-बकाल
सै दिनुगै सूं ले’र
रात तांई भाज्या फिरै
सर्दी गिणै न गर्मी
म्हारै सूं बडा
म्हारा ई कई रिस्तेदार
घणा ई पचै
फेर म्हारै में कदे-कदे
ओ आळस क्यूं आवै
म्हारी समझ रै खातै में तो
कीं कमी नीं लखावै
स्यात म्हारै हिवड़ै में
बां कई पळगोडां री
छियां पड़्योड़ी है
जका म्हैं कदे देख्या हुसी
इनै-बिनै
अठी-उठी।