पंहिंजी नंढिड़ी दुनिया खां ॿाहिर निकरी
सॼी ख़यालात खे
सृष्टीअ जी विशालता सां
हम-आगोश करे छॾि-
इन्सान ते
फ़ेलसूफ़नि जी ज़हमत!
‘ऐयरकंडीशंड’ बंगलनि मां
या
पहरेदारनि जे परियां बिही
अवाम खे उभारणु:
‘वतन तां सिर घोरे छॾि’-
इन्सान ते
सियासतदाननि जी ज़हमत!
दुख सुख ईश्वर जी माया आहे
जहिड़ो जंहिंजो मुक़दर
रज़ा ते राज़ी रहु
निन्ड में सुम्हारे छॾण जी तरतीब-
इन्सान ते
धर्म जे रखवारनि जी जहमत!
औरत
आत्मिक उन्नतीअ जी राह में
रुकावट आहे
हुन जे ज़िस्म जो तसव्वुर बि न करि-
इन्सान ते
योगियुनि ऐं तपस्वियुनि जी ज़हमत!
मुंहिंजो ‘मान’
कंडनि जे ढेरनि अंदर दॿियलु
हर पहलुअ जो
ज़र्रो ज़र्रो जख्मियलु
चिचिरजी वियलु;
कंडा आश्कार आहिनि
मुंहिंजो ‘मान’ गुम आहे;
मंुहिंजी नन्ढिड़ी दुनिया
मुंहिंजो घरु
वसीअ दुनिया सां
विशाल आत्मा सां
कुशादी क़ौमियत
ऐं
सर्व समाज सां
हम माना थी वियो आहे;
मां
पंहिंजे ‘मान’
ऐं पंहिंजे घ्ज्ञर खे
ऊंदाहियिुनि जे उमीक़ अंदर
थाफोड़ा हणी
ॻोले रहियो आहियां!
किथे आहे मुंहिंजो ‘मान’
मुंहिंजो नन्ढिड़ो प्यारो घरु
‘विशालता’ खां वॾो
जंहिं अॻियां
मुंहिंजे लाइ
दुनिया जो तसव्वुर
हिक ॿुड़ीअ मिसल आहे!