घणा सुपना अगु
जॾहिं मूं तोखे ॾिठो हो
इएं लॻो हो
फ़क़ति मूं ई तोखे ॾिठो हो
ॿिए कंहिंजी तेाते नज़र ई न पेई
हुई
हिकु सुपनो हो
तुंहिंजो ऐं मुंहिंजो सुपनो
ॾींहं ऐं रात जो सुपनो
निंड ऐं जाॻ जो सुपनो
हक़ीक़त ऐं ख़्वाब जो सुपनो
ज़िन्दगीअ जे छोलीमार दरवाह में
असाजो सुपनो हिकु नंढिड़ो ॿेटु हो
पंहिंजी ज़मीन पंहिंजो आसमानु
पंहिंजा किनारा पंहिंजा सिजु चंडु तारा
घणा अरमान पोइ
तुंहिंजे सरीर जा गुल मुरझाइजी विया
मुंहिंजे बदन जो काठु भुरी पियो
सुपना त सुपना थी विया
हक़ीक़तूं बि ख़्वाब थी वेयूं!
छाजी ज़मीन? छाजो आसमानु?
कंहिंजा किनारा? कहिड़ा सिज चंड तारा?
तूं ऐं मां
जीअण जी जंगि लड़न्दे
पंहिंजे ई घर में कै़दी थी वियासीं!
ॾींहं जो हसरत ऐं रात जो अरमान थी
जीअन्दा रहियासीं
ऐं ज़िंदगीअ जे ज़रूरतुनि जी
क़ीमत चुकाईन्दे
दाल रोटी थी रहिजी वियासीं।