हुई तरक्की भोत मारगी या गड़बड़ बंटवारे की॥
सदा कमेरा वर्ग दबाया या नीति हिन्द म्हारे की॥
1
सबको मिलै पढ़ाई छह अरब डालर का खरच बताया
अमरीका मैं श्रंगार तांहि आठ अरब डालर जावै खिंडाया
पाणी और सफाई का खरचा नौ अरब डालर आज दिखाया
ग्यारा अरब डालर यूरोप मैं आइसक्रीम पर खरचा आया
चार सौ अरब डालर का नशा करावैं होज्या शक्ल छुहारे की॥
2
सबकी सेहत की खातर तेरा अरब डालर कुल चाहवैं सै
अमीर रुक्के मारैं पीस्से कोण्या म्हारा सेहत बजट घटावैं सै
अमरीका यूरोप के कुत्ते बिल्ली सतरा अरब डालर खावैं सै
जापान मैं मनोरंजन पै ये पैंतीस अरब डालर बहावैं सैं
झूठी कोण्या जमा साची सै तसबीर इस विकास प्यारे की॥
3
झूठा नहीं कोए आंकड़ा मानव विकास रिपोर्ट मैं बताया
तीसरी दुनिया चूस बगादी ईब जी सेवन दुनिया मैं छाया
विश्व बैंक और डब्ल्यूटीओ नै अमीरां का साथ निभाया
मुद्रा कोष नै डान्डी मारकै म्हारा नाश का बीड़ा ठाया
नौकरी खत्म करण लागरे कविता सविता मुखत्यारे की॥
4
नशे की दवाई और दारू बेचैं दूसरा धंधा हथियारां का
तीसरा धन्धा इत्र फुलेल का इन अमरीकी साहूकारां का
विकास नहीं विनास पै टिक्या जीवन इन थानेदारां का
बंटवारा ठीक हो दुनिया मैं मन नहीं करता ठेकेदारां का
अमीर गरीब की खाई मैं मर आई रणबीर बिचारे की॥