केटा : आजमात्रै पूरा भो आँखाभरि हेर्ने रहर
वर्षौ पछि भेटेको सुनाऊ केही नयाँ खबर
केटी : के सुनाउँ खबर म सबैसबै पुरानो भो
हजुरसँग टाढिँदा जिन्दगी नै बिरानो भो
केटा : एकपल्ट तिमीलाई देख्ने इच्छा थियो
ईश्वरले आज रहर पूरा गरिदियो
केटी : हजुरलाई सधैँ खुसी देख्न पाऊँ भन्थेँ
नदेखेको यति भयो भनी दिन गन्थेँ
केटी : सपनीमा देख्थेँ कहिले उडिजाऊँ लाग्थ्यो
टाढैबाट एक झल्को देख्नपाऊँ लाग्थ्यो
केटा : प्राप्ति पनि माया नै हो त्याग पनि माया
छुटे पनि तिमी मेरो सँगै हिँड्ने छाया
केटी : आफ्नो ख्याल राख्नू नि नभुल्नू है मेरो हजुर !
केटा : सम्झनाको के कुरा सम्झेकै छु हरेक प्रहर !