3,614 bytes added,
13:06, 8 अप्रैल 2018 {{KKGlobal}}
{{KKRachna
|रचनाकार=[[मोनिका गौड़]]
|अनुवादक=
|संग्रह=अंधारै री उधारी अर रीसाणो चांद / मोनिका गौड़
}}
{{KKCatKavita}}
{{KKCatRajasthaniRachna}}
<poem>
थरपीज रैया है
सोशल मीडिया मिंदर रा
मोटा नांव, मोटा पद
मोटा सम्पर्क मोटा ही कद
हाजरिया हलावै... घंटी-झांझ
भखावटै चढावै पीरां-देवां री वॉल
लाइक्स रा ठोसा (ठेंगा)
कमेंटां रा माळीपाना
बजावै थोथा गाल, करै आरती
कूड़ी झालरां झणकारता
...पीरां रो सगल ‘फोटू’
महफिलां में ऊंघता
देवां री फोटू
सोसल मीडिया
अपलोड करता केमरामैन
चित चढिया... कलाकार
पा जावै प्रमाण-पत्र सुधी साहित्यकार रो
मांडता आपरा थान
ऊगेरै नित नेम सूं पीरां री
चरण-चम्पी री राग चालपूसी
सम्मानां सत्कारां रै भारियै
टसकै कलम
करण नीं देवै उणनै साच री ‘चूं’ भी
चूं-चूं करता चुस्सा
चूस रैया है पीरां रो तथाकथित जमीर
देवां री पोस्ट
नूंवै परचै ज्यूं
हलकारां-हाजरियां ठोकै स्माइली री
भच्चीड़-उपाड़ ताळ्यां
मन-मन मोदीजता पीरां री हांसी गजल
पीरां री खांसी नज्म
अपनावायु भी गीत
रचै माचै पसरिया... चेतना री रीत
सोसल मीडिया रा पीर
रच देवै खांसता-छींकता भी काळजयी साहित्य
लोकधर्मी क्रांतिचेता सबद
चुटक्यां में बणावै... हाजरियां रो भविस्य
कदैई घाल देवै अेकाध टुकड़ो
इनाम-इकरार रो
लार-लपकायां मूंडै मांय टुकड़ैल
लपक लेवै पीरां री वाणी सूं
अवसर रा पगोथिया
राफां तिडक़ायां भीड़ भेळै
फोटू में आवण सारू...
पण जाणो हो
सार्वजनिक वॉल माथै चिपै विग्यापन
मर्दाना ताकत बधावण सूं लेय’र गरभ-निरोधक तांई
भींता थूकै...
पूंछै सेडो सडक़ चालतो
करै गीली गिंडकड़ा
पण
पीरां री वॉल
पावन-पवित है
हाजरिया चमकावै उणनै
जीभां पाण
क्यूंकै बै है सोशल मीडिया रा पीर।
</poem>