हीअ दुनिया / अर्जुन ‘शाद’

मुंहिंजी हिन दुनिया सां दिल आ!
1.
ठाहियां रूहानी दुनिया छो?
पाछनि मां छा आनन्दु ईन्दो?
ज़ाहिर सुख खे तर्कु करे छो
कल्पित सुख लइ पाणु विञायां
चैन हक़ीक़त सां वासिल आ
मुंहिंजी हिन दुनिया सां दिल आ!

2.
मृत्यु सां थिए जीवन पूरो
मिटिजी खाक़ थिए जिस्म समूरो
हीअ मिट्टी ॿीअ मिट्टीअ जहिड़ी
मिट्टीअ मां छा जीवन उथन्दो?
थियणो कुझु बि न हड़ हासिल आ
मुंहिंजी हिन दुनिया सां दिल आ!

3.
नाज़ अथमि पंहिंजे बाजुनि ते
फेरे बाग़ करियां बरपट खे
हिन नंढिड़े जीवन में मां पियो
ख़ूब मज़ो मेहनत जो माणियां!
मनु हिन आनन्द ॾे माईल आ
मुंहिंजी हिन दुनिया सां दिल आ!

4.
वरंदो कीन अखियुनि पूरण मां
कुझु पातो कंहिं मन ढूंढण मां?
सभ जो सुख जिनि हड़प कयो आ
तिनि हड़पनि खां सुख खे खसिबो
सुखु त सुजाॻीअ मां शामिल आ
मुंहिंजी हिन दुनिया सां दिल आ!

5.
कुदरत में सुख जा जे ज़रीआ
तुंहिंजे मुंहिंजे हाइ थिया पैदा
तो मूं भी जे चैन न पातो
ढोर त तिनि जो फै़ज़ न वठंदा
सुखु पाइणु छो थियो मुश्किल आ
मुंहिंजी हिन दुनिया सां दिल आ!

6.
जो सुख पंहिंजे चौबारे में
सो किथे बल्ख़ बख़ारे में
दुयिा हीअ इन्सान जो घरु आ
घर ठाहे सभ जो सुख ठाहियूं
हर को सुख जो ई क़ाइल आ
मुंहिंजी हिन दुनिया सां दिल आ!