मलाई
पत्थर बनेर बाँचिरहने मन भएन
मैनबत्तीझैँ पग्लिएर बग्ने रहर भएन
हावा बनेर उडूँ-उडूँ
लाग्दै लागेन ।
चाहना त असफल भइदिने थियो ।
हिँड्दाहिँड्दै बाटो भत्काएर
भीरबाट लडिझर्ने मन थियो
डुङ्गामाथि चढेर नदी पार गर्दागर्दै
हामफालेर समुद्रमा पुगी हराइजाने रहर थियो
आकाश चिरेर कुङ्केराको देश खोजी
उतै हराइजाऊँ लागेको थियो ।
लागेको थिएन बद्लिएर बाँचू ।
सफलताको कथा सुनिदिने
तिमी भेटिएपछि
बदिलएको छ चाहना
बद्लिएको छु म ।
तिम्रो अँगालोमा बास बसेपछि
मेरो पुनः जन्म भएको छ ।
०००
* कुङ्केरा - कऱ्याङकुरुङ चरा