आज यो अँध्यारोले (युवक) / सुमन पोखरेल

आज यो अँध्यारोले बिर्सिएको बात सम्झायो
मैनबत्तीको उज्यालोले तिमीसँगको रात सम्झायो

कहिले लजाएझैँ कहिले रिसाएझैँ बतासका मायाहरूमा
कति राम्रा बुट्टा बनेका भित्ताभरिका छायाहरूमा
यो बुट्टाले मेहन्दी लागाएको, मलाई तिम्रो हात सम्झायो
आज यो अँध्यारोले बिर्सिएको बात सम्झायो

बलिरहने, चलिरहने, यो बत्तीलाई यौवनको हलचल
कहिले लाडिने, कहिले जिस्किने सँधैभरि नै चञ्चलचञ्चल
यो शिखाले तिम्रो मेरो, मलाई बैँसको मात सम्झायो
आज यो अँध्यारोले बिर्सेको बात सम्झायो