पीलू
तर्ज़: खाकर कसम वो कहते हैं, किस सादगी के साथ...
शइरु:
जंहिंजो सचाई तीर, अहिंसा कमान आ,
तंहिंजे विजय में छा कोई बाकी गुमान आ?
आधार ते ई जंहिंजे ही हिन्दोस्तान आ,
गांधीअ जो चरखो शेरदिल गांडीव समान आ।
थल्ह:
हर कंहिं जो पेरु जंग जे मैदान ॾांहं खॼे,
ऐ जवान इंकलाब जो वाॼो वॼी वॼे।
शइरु:
जोधा हलनि जो मुर्कंदा मैदाने जंग में,
उत्साह सूरमनि संदो ईंदो उमंग में,
तासीर थिए भलि तेग़ जो तीरो तुफंग में,
धरतीअ जो पांदु भलि फिरी थिए लाल रंग में।
सख्तियुनि खां कीन, सूरमो वेढू झुरे झिजे,
ऐ जवान इंकलाब जो वाॼो वॼी वॼे।
शइरु:
आहे ॾुखेरी वाट संभाले कदम खणो,
भारत जा वीर क़ौमी क़िले ते धॼा हणो,
कमती थिए न शेर जींअं ईमान मां अणो,
साबित सचार बांका जीअं भीषम जियां बणो।
मुहबत में हरको मुल्कजे सूहर््य रच रॼे,
ऐ जवान इंकलाब जो वाॼो वॼी वॼे।
शइरु:
माता खे दर्द में ॾिसी वेहिणु गुनाह आ,
ॼाणो त हिन्दु लाइ ही पोयों पसाह आ,
जंहिंखे बि मुल्क लाइ, ‘‘दुखायल’’ को चाह आ,
तंहिं मर्द लाइ दुनिया जो ही इज्ज़त ऐं चाह आ,
ॼाणी ही फर्जु मर्दु न मैदान मां भॼे
ऐ जवान इंकलाब जो वाॼो वॼी वॼे।