कहँवा जाईं? / रामरक्षा मिश्र विमल

पूस माघ जब तवे तपावे
    फागुन बरिसे मेघ
कहऽ तब कहँवा जाई ?

हँसि हँसि के बतिया के हमरा
हियरा माँझ समाके हमरा
सधियन के अहड़ा सुनगावे
घर में मारे सेंध
कहऽ तब कहँवा जाई ?


             मधुर बचन नयनन चतुराई
             प्रॉमिस कइ पूँजी फँसवाई
             सॉरी के संदेश पठावे
             गरदन दे जब रेत
             कहऽ तब कहँवा जाई ?


फोन करीं स्विच ऑफ देखावे
घर पर दू ताला लटकावे
पइसा ले रोजे दउरावे
करे न कबहूँ भेंट
कहऽ तब कहँवा जाई ?