४६. जन्म
एउटा सुरूवात गजबको
अज्ञातबाट अज्ञाततर्फ
तपाईँ हामी सबैको ।
४७. जुनी
अहिले म आकाशमा उडिरहेछु
थाहै हुन्न कतिखेर त्यतै अन्धकारमा
बिलाइसक्छु ।
४८. यात्रा
घोडा छ लगाम छैन
विकल्प भने फेरि यस्तो-
लगाम छ घोडा छैन ।
४९. गलत प्रश्न
तपाईँ मान्छे नै हुनुहुन्छ हैन र ?
शङ्का गर्यौ, ठिकै गर्यौ
म मान्छे भएको भ्रम मात्र हुँ ।
५०. अन्तिम दृश्य
सञ्जय ! अब केही देखिन्न र ?
देखिन्छ महाराज !
सर्वत्र अदृश्य देखिन्छ ।