एउटा हृदय खोजिरहेछु म
आफूभित्र ।
सृष्टीका तमाम पीडाहरू निलेर हर्षित
संसारभरका आँशुहरूलाई ग्रहण गरेर प्रफुल्ल
यावत् अँध्यारालाई आफूमा विलिन गरेर प्रदीप्त
स्निग्ध, ओजस्वी, निर्मल एउटा हृदय
खोजिरहेछु म आफूभित्र ।
बाँढेर कहिल्यै नसकिने
धर्तीजस्तो वा आकाशजस्तो हृदय,
बाँढ्न सकूँ म
प्रत्येक कोपिलाहरूलाई, जीवनहरूलाई, सपनाहरूलाई,
दिन सकूँ
उल्लास, मौनता र वेदनाहरूलाई ।
निरन्तर उज्यालो दिने एउटा हृदय
खोजिरहेछु म आफूभित्र ।