(41)
जबतें सिधारे यहि मारग लषन-राम,
जानकी सहित, तबतें न सुधि लही है |
अवध गए धौं फिरि, कैधौं चढ़े बिन्ध्यगिरि,
कैधौं कहुँ रहे, सो कछू, न काहू कही है ||
एक कहै, चित्रकूट निकट नदीके तीर,
परनकुटीर करि बसे, बात सही है |
सुनियत, भरत मनाइबेको आवत हैं,
होइगी पै सोई, जो बिधाता चित्त चही है ||
सत्यसन्ध, धरम-धुरीन रघुनाथजूको,
आपनी निबारिबे, नृपकी निरबही है |
दस-चारि बरिस बिहार बन पदचार,
करिबे पुनीत सैल, सर-सरि, मही है ||
मुनि-सुर-सुजन-समाजके सुधारि काज,
बिगरि बिगरि जहाँ जहाँ जाकी रही है |
पुर पाँव धारिहैं, उधारिहैं तुलसीहू से जन,
जिन जानि कै गरीबी गाढ़ी गही है ||