घरबे के सरग बनइबइ / उमेश बहादुरपुरी

घरबे के सरग बनइबइ,
गंगाधाम काहे ले जइबइ
काहे ले जइबइ हम काहे ले जइबइ ....
ससुरा शिव हथ सासू जी गौरा,
उनखे डोलइबन रात-दिन चौरा
घरबे में कैलास बनइबइ
बाबाधाम काहे ले जइबइ
घरबे ...
लछुमन जइसन सुंदर देवरवा
राम जइसन सइयाँ के चेहरवा
घरबे में अयोध्या बनइबइ
अवधधाम काहे ले जइबइ
घरबे ....
बड़की गोतिनियाँ ओढ़ावे अँचरवा
छोटकी ननदिया लगाबे कजरवा
अपन घरबे के चक्कर लगइबइ
चारो धाम काहे ले जइबइ
घरबे ....