अघि सर, अघि सर, साहस जोड
कातरपन ली प्राण नछोड
पाइन बलको अब देखाऊ
बैरीलाई मार भगाऊ ।
चम्क युवक, अब चम्कन चम्क, छाती फुकाई लम्कन लम्क।
हृदय-हृदयमा जोश बढाऊ
मर्ने तन यो अमर गराऊ
जीवन कच्चा, मर्नु छ पक्का
स्वर्गिक द्वार छ देऊ धक्का
चम्क युवक, अब चम्कन चम्क, छाती फुकाई लम्कन लम्क ।
कदम-कदममा भेट्नपरोस्
लाखौँ बाधा बज्रकठोर
निर्भय दनदन गोली चलाई
मार्दै जाऊ वैरीलाई
चम्क युवक, अब चम्कन चम्क, छाती फुकाई लम्कन लम्क ।
बरु बाँच युवक दुइ घडिमात्र
चम्की उज्ज्वल पारि समस्त
के छ र बाँची लाखन वर्ष
पारि अँध्यारो बाहिर-भित्र ?
चम्क युवक, अब चम्कन चम्क, छाती फुकाई लम्कन लम्क ।
तिमि ह्वौ गौरव जगतीनलको
तिमि ह्वौ तागत धन को, जनको
तिमि ह्वौ आशा दुःखीहरूको
तिमि ह्वौ सारा सारा जनको
चम्क युवक, अब चम्कन चम्क, छाती फुकाई लम्कन लम्क ।
.........................................
उदय, १७, आषाढ १९९५