चाल़ घूमांगे हरयाणा
घूमाद्यूं सारा हरयाणा
सै सबनै प्यारा हरयाणा
सै सबतै न्यारा हरयाणा
चाल घूमांगे
पहलां कुरूक्षेत्र चाल्लांगे
ज्योतिसर सै जड़ म्है
गीता का था ज्ञान दिया
उड़ै श्री करसन जी नै
कर दरसन स्थाणीश्वर के
नहाकै ब्रह्मसरोवर आणा
चाल घूमांगे
यमुनानगर चाल्लागें सारे
कलेसर अर त्रिलोकपुरी
सरस्वती उद्गम आदिबद्री
सै कपालमोचन तीर्थ भी
यमुना जी म्है नहा कै
फेर हथिनीकुंड भी जाणा
चाल घूमांगे
अम्बाला ऐतिहासिक नगरी
दुनिया म्है प्रसिद्ध बड़ी
गुरद्वारे सैं कईं ख़ास
देवी अम्बा साक्षात् खड़ी
घग्गर के कांठै बस रह्या
फौज का बण्या ठिकाणा
चाल घूमांगे...
वृद्धकेदार अर ग्यारहरुद्री
सैं कैथल की शान
नवग्रह मंदिर कपिलमुनि नै
बतावैं लोग महान
नहा कै फल्गु तीर्थ
चालाँ बाबा लदाना
चाल घूमांगे
देवसागर धाम भिवानी
दादरी का शिव मंदर
नौरंगाबाद का टीला
लोहार पीर सै सुंदर
देख सारा भ्याणी
मंदर हीरापुरी जाणा
चाल घूमांगे
मेला सूरजकुंड का सै
हरयाणे की शान
बड़खल अर झील मोर
सदा तै इसकी जान
देख बाबा फरीद गुंबद
जावै फरीदाबाद पिछाणा
चाल घूमांगे
धनकोट अर सयैद सैं
द्रोणाचार्य का ठिकाणा
शीतला माता के नाम तै
गुड़गांवा जावै जाण्या
उजिणा झील के पाच्छै
संघेल अर मलाब दिखाणा
चाल घूमांगे
जयंती देवी के जींद म्है
तीर्थ अश्विनी अर यक्षिणी
सर्पदमन अर बराह तीर्थ
जामणी का जमदग्नि
इन सबके गेल्याँ हमनै
पांडु - पिंडारा जाणा
चाल घूमांगे
देखै पंचकुला होग्या इब
नगर आधुनिक खास
दो झील बड़ी सुंदर
एक पुराणा क़िला पास
सदी 12वीं का मंदर
जा देख कै आणा
चाल घूमांगे