प्लैटफ़ार्म ते
बीठल रेल गाॾी
बीठल रेल गाॾी
हले नथी हले
तॾहिं मूं बाबा खां पुछियो
रेल कॾहिं हलन्दी?
बाबो बि बेख़बर हो
पर त बि चयाईं
‘जॾहिं रेल जे दॿे ते
लिखियल लफ़्ज़
सही पढ़िया वेन्दा
हीअ रेल हलन्दी।’
मूं उहे लफ़्ज
न पढ़ी बि पढ़िया
शायद
ॿियनि बि इएं ई पढ़ियो
सभु ग़लत हुआसीं
सभु ग़त थियासीं
रेल कान हली।
तॾहिं हिक घोरिड़िये बि
उहे लफ़्ज़ पढ़िया
ऐं वॾे वाके चयाईं
‘हिन्दू पाणी... मुसलमान पाणी’
ऐं रेल हली पेई!
जॾहिं रेल हली हुई
हुननि चंड रात कई
चंड भिटिकियल रेल गाॾीअ मथां
चांडोकीअ जा गुल
झिणिकाईन्दे छिणिकाईन्दे
पंहिंजे वजूद खे
धरतीअ ते
टुकर टफकर करे
खोहे छॾियो
तॾहिं मूं चंड खां पुछियो
तुंहिंजे हस्तीअ जो छा थियो?
चयाईं-
‘रेल गाॾीअ ते लिखियल लफ़्ज़
मूं बि पढ़िया हुआ
मां बि दोखो खाई
हलन्दड़ गाॾीअ में
चढ़ी पियो होसि
पंहिंजी चांदनीअ ते
बे-भरोसे थी
लोह जे चिमकन्दड़ पटनि ते
भरोसो कयो होमि
असीम सुख ऐं भोॻिता
असां जे आत्मा खे
पाण वटि गिरवी रखी
पंहिंजी छांव में
असांखे आसिरो ॾीन्दा आहिनि
मूं बि उन उपभोॻिता में
पाणु विञाए
पंहिंजो आतुम
खोहियो आहे
ऐं हाणि
पंहिंजे आकार खे विटोरे
भिटिकन्दो थो रहां,
भिटिकन्दो थो रहां।’
ऐं-
उन खां पोइ
चंडु कॾहिं बि
पंहिंजी आत्मा सां
कोन उभिरियो।
मां...
मां उन गाॾीअ में
कोन चढ़ियो होसि
पर चाढ़ियो वियो होसि
उमिरि ई अहिड़ी हुई
उन वक़्ति
बाबे बि झटि पटि कई
तकड़ि में हुन जी जुती
प्लैटफ़ार्म ते रहिजी वेई
उन वक़्ति
पंहिंजे नंढिड़ियुनि अखियुनि
उन जुतीअ खे चिताए ॾिठो हो
मुंहिंजी विख एॾी वॾी न हुई
जो जुती बि खणां ऐं रेल बि खणां
बाबे जी जुती
मुंहिंजे आईन्दे जी पूंजी
उते ई रहिजी वेई।
रेल मां लटिकन्दड़
मुंहिंजूं जुंघूं नईं हवा जे
तेज़ रवातनि तां
गसी... गसी...
अजु पंहिंजो आकारु
खोहे चुकियूं आहिनि
चवन्दा आहिनि
नन्ढे हून्दे जी विॾ
वरसो थी पवन्दी आहे
अजु-मां बि
वारिसी अपाहिज आहियां
जंहिंजो इलाजु
अलाजे आहे या न आहे!
सचु त तुंहिंजे मथे में
इहा बीमारी आहे ई कान
पोइ बि मुंहिंजे पोंयनि खे
इहा बीमरी
पंहिंजे मथे ते
खणिणी ई पवन्दी।
अजु मुंहिंजी नज़र सिर्फ़
बीमार माण्हू ई
ॾिसी रही आहे
मं उन्हनि माण्हुनि खां पुछियो
‘तव्हां बीमार कीअं थिया?’
चयाऊं
‘असां बि रेल गाॾीअ ते
लिखियल लञ़ज़ ग़लत पढ़िया हुआ
पर रेल हली पेई।
सवारी थीन्दी
शैलु थीन्दो, इहा पक हुई
रफ़्तार ते सवारी
शूरवीर ई कन्दा आहिनि
असां बि रफ़्तार ते सवार थियासीं
पर सवारीअ लाइ जा सघ घुरिजे
उहा त सवें साल अगु
असां विञाए छॾी हुई
असां जी जुती बि
प्लैटफ़ार्म ते रहिजी वेई आहे।’
त पोइ जं़जीर छिकियूं?
न... न...
इएं हरगिज़ न थियणु घुरिजे
प्लैटफ़ार्मु त घणो तणो
पुठिते रहिजी वियो आहे
वक़्तु बि गुज़िरी चुको आहे
बाक़ी जुती
असांजे पेरनि लाइ हून्दी बि या न!
(इन्हीअ में बि शकु आहे)
वक़्तु उन जो मिक़दारु घटाए
ऐं असांजे पेरनि खे
वधाए छॾियो आहे।
तॾहिं मूं
हुननि जे पेरनि ॾांहुं ॾिइो
हुननि खे पेर हुआ ई कोन
हू बि मूं वांगुरु अपंग हुआ।
पर पोइ बि
अलाजे छो
मूंखे विश्वासु हो
बाबे जी छॾियल जुती
मां कमि आणे सघन्दुसि।
मां रिड़हन्दो रिड़हन्दो
प्लैटफ़ार्म ते पहुतुसि
ॾींहं जी तेज़ तपति में
धरती बाहि में थे ॿरी
बाबे जी जुती
विच प्लैटफ़ार्म ते पेई हुई
शायद उन खां पोइ
उतां का रेल गाॾी
कान गुज़िरी हुई
ऐं हू उहो ई घोरिड़ियो
जुतीअ जे अॻियां वेठो हो
हू उन चुतीअ खे
चिताए ॾिसी रहियो हो
भयानक थधि, जा
शायद रेल जे वञण खां पोइ,
हुन जे सरीर खे वकोड़े वेई हुई
हुन जे झुरियल मास ते
थधि जो अणिभो ख़ुश्कु तहु
साफ़ नमूदार हो
हू पंहिंजा पेर वर वर जुतीअ में
फहकाए रहियो हो, तॾहिं मूं
हुनखे हकल कई
ऐं हुन मूंखे सुञाणी वरितो
मुंहिंजे बाबे जी जुती
पंहिंजनि हथनि में खणी
हू मुंहिंजे आॾो अची बीठो।