जूण जातरा / संजय पुरोहित

मिरतू जातरा
रेलगाडी री भांत
टेसण-टेसण पड़ाव
जंक्सन ठिकाणां
भाजता रूंख
छूटतो कडूम्बो
धूळ रा बादळ
विचारां री झड़ी
बणता बिगड़ता
निजर सूं दूर उड़ता
आस रा धोरा
जूण रा गेड़ा
पुळ-अंधड़-सुरंग
पण फेर भी आस
सांतरी आस
कै म्हारी जातरा होवैली पूरी
पूरो है ओ म्हारो विसवास
जिनगाणी री आ छुक-छुक
म्हारी जूण चौपड़ी में
मांडैली आगै रो ठिकाणों
बो ठिकाणों
म्हारै विसवास रो।