समय के उखड़ खाबर
अगर रिस्ता
करै के हो बराबर
तब तनी तनो,
समय आ गेलो हे
दिन नै गिनो
तोहर मन,
इहे तो हो
धरती के धन
तोरे मन पर
उगऽ हे घास,
तोर टंगल है
दुनियाँ भर के विस्वास
तोहर मन
लोहा के जवाब हो,
तोरा सामने
न कोय राजा
न नवाब हो
तों अपना के हीन समझऽ हा,
शत्रू के संगीन समझऽ हा
खाली हहर गेला हे,
राह में
चलते-चलते ठहर गेला हे
खुद चलो,
अउ दोसरो के चलबो,
फेर से
आजादी के मसाल जलबो
लड़ो,
जइसे लड़ला हल
बढ़ो
जैसे बढ़ला हल।